بنگلورو: ‘ویسٹرن اسٹائل’ پرپوز کے بہانے، گرل فرینڈ نے عاشق کو باندھ کر زندہ جلا دیا

بنگلورو 22 اپریل:(اردودنیا.اِن/ایجنسیز)بنگلورو میں ایک انتہائی ہولناک اور چونکا دینے والا واقعہ پیش آیا جہاں ایک خاتون نے مبینہ طور پر اپنے بوائے فرینڈ کو زندہ جلا کر قتل کر دیا۔ یہ واقعہ بیاڈراہلی پولیس اسٹیشن حدود کے انجانا نگر علاقے میں 21 اپریل کو دوپہر تقریباً دو بجے پیش آیا، جس نے پورے علاقے میں سنسنی پھیلا دی۔

پولیس کے مطابق 27 سالہ کرن اپنی گرل فرینڈ پریما کے گھر اس وقت گیا جب وہاں کوئی اور موجود نہیں تھا۔ الزام ہے کہ پریما نے اسے یہ کہہ کر اندر بلایا کہ وہ اسے “انگریزی انداز” میں پرپوز کرے گی۔ اس کے بعد اس نے مبینہ طور پر کرن کے ہاتھ پاؤں باندھ دیے۔

ابتدائی تفتیش میں شبہ ظاہر کیا جا رہا ہے کہ پریما نے قتل سے قبل کرن کے ساتھ جنسی تعلق قائم کیا، جس کے بعد اس پر مٹی کا تیل ڈال کر آگ لگا دی۔ شدید جھلسنے کے باعث کرن موقع پر ہی ہلاک ہو گیا۔ پولیس کو یہ بھی شبہ ہے کہ ملزمہ نے اس پورے واقعے کی ویڈیو اپنے موبائل فون میں ریکارڈ کی۔

پولیس افسر ناگیش کے مطابق، مقتول اور ملزمہ ایک ہی کمپنی میں کام کرتے تھے اور دونوں کے درمیان تعلقات محبت میں تبدیل ہو گئے تھے۔ تاہم حالیہ دنوں میں کرن نے پریما سے دوری اختیار کر لی تھی اور اس کا نمبر بھی بلاک کر دیا تھا، جس کے بعد دونوں کے درمیان تنازع بڑھ گیا۔

تحقیقات سے یہ بھی انکشاف ہوا ہے کہ پریما نے پہلے سے قتل کی منصوبہ بندی کر رکھی تھی۔ اس نے مٹی کا تیل اور پٹرول خرید رکھا تھا اور کرن کو باندھنے کے لیے آن لائن ہتھکڑیاں بھی منگوائی تھیں۔ بتایا جا رہا ہے کہ وہ کرن کو شادی کے لیے راضی کرنا چاہتی تھی، لیکن تعلقات میں کشیدگی بڑھنے کے بعد اس نے انتہائی قدم اٹھایا۔

مزید حیران کن بات یہ سامنے آئی ہے کہ ملزمہ نے قتل کے بعد خودکشی کا بھی منصوبہ بنایا تھا۔ اس کے کمرے سے زہر کی بوتل اور گولیاں برآمد ہوئی ہیں۔ تاہم آگ کی شدت سے وہ خود بھی جزوی طور پر جھلس گئی اور گھبرا کر موقع سے فرار ہو گئی، بعد میں ایک پڑوسی نے اس کی مدد کی۔

پولیس نے ملزمہ کو حراست میں لے لیا ہے اور اس سے پوچھ گچھ جاری ہے۔ سینئر افسران نے جائے وقوعہ کا معائنہ کیا جبکہ بیاڈراہلی پولیس نے مقدمہ درج کر کے مزید تحقیقات شروع کر دی ہیں۔