بین ریاستی خبریں
چنڈی گڑھ میئر الیکشن: بی جے پی کی سربجیت کور 14 ووٹوں کے ساتھ چنڈی گڑھ کی نئی میئرمنتخب
چنڈی گڑھ ،08؍ جنوری:(اردودنیا.اِن/ایجنسیاں)بی جے پی نے چندی گڑھ میں چندی گڑھ میونسپل کارپوریشن کے میئر کا انتخاب جیت لیا ہے۔ بی جے پی کی سربجیت کور چندی گڑھ کی نئی میئر ہوں گی۔ سربجیت کور کو 14 ووٹ ملے، جبکہ عام آدمی پارٹی کو 13 ووٹ ملے۔ ویلیٹ پیپر پھٹا ہونے کی وجہ سے عام آدمی پارٹی کا ایک ووٹ منسوخ کر دیا گیا۔
جس کے بعد پارٹی کارکنوں نے ہنگامہ کیا۔کانگریس اور اکالی دل نے ووٹنگ میں حصہ نہیں لیا۔ میئر کے انتخاب کے بعد عام آدمی پارٹی نے ہنگامہ کیا ۔ اس دوران خوب نعرے بازی بھی کی گئی۔ ہنگامہ اس قدر بڑھ گیا کہ پولیس کو بھی بلانا پڑا۔ اس دوران آپ کونسلر بھی میئر کی کرسی کے قریب دھرنے پر بیٹھ گئے۔
وہ ایک ووٹ کی منسوخی پر ناراض تھے۔واضح رہے کہ میونسپل کارپوریشن میں میئر کا عہدہ صرف ایک سال کے لیے ہوتا ہے۔ ہر سال نئے میئر، سینئر ڈپٹی میئر اور ڈپٹی میئر کا انتخاب ہوتا ہے۔ ایسے میں چندی گڑھ کے میئر کی کرسی کے لیے سال بھر جوڑ توڑ کی سیاست جاری رہتی ہے۔
مطلب اگلے سال جب کوئی کونسلر دوسری پارٹی میں شامل ہوتا ہے تو صورتحال بدل جاتی ہے۔ چنڈی گڑھ میونسپل کارپوریشن انتخابات میں کانگریس نے 8 سیٹیں جیتی تھیں جبکہ اکالی دل صرف ایک سیٹ جیت سکی تھی۔
