انتخابی ضابطہ اخلاق کی پابندیاں ریٹائرڈ سرکاری افسران پر بھی لاگو، الیکشن کمیشن کی اہم ہدایات
نئی دہلی، 10 نومبر (اردو دنیا نیوز/ایجنسیز) الیکشن کمیشن نے انتخابی عمل کے دوران سرکاری ملازمین کی سیاسی غیر جانبداری یقینی بنانے کے لیے اہم ہدایات جاری کرتے ہوئے واضح کیا ہے کہ مثالی ضابطۂ اخلاق (ایم سی سی) کی پابندیاں ریٹائرڈ سرکاری افسران اور ملازمین پر بھی نافذ ہوں گی۔ ایسے سبکدوش افسران جو کسی بھی حیثیت سے ریاستی حکومت یا مرکز کے زیر انتظام علاقوں کی انتظامیہ سے وابستہ ہیں، انہیں بھی انتخابی مدت کے دوران سیاسی سرگرمیوں سے دور رہنا ہوگا۔
الیکشن کمیشن نے 9 نومبر 2026 کو گوا، منی پور، پنجاب، اتر پردیش اور اتراکھنڈ کے چیف سکریٹریز اور چیف الیکشن افسران کو خط ارسال کرتے ہوئے اپنی سابقہ ہدایات کا اعادہ کیا ہے۔ کمیشن نے کہا ہے کہ انتخابی عمل کے دوران سرکاری ملازمین کو کسی سیاسی جماعت یا امیدوار کی انتخابی مہم میں حصہ لینے اور اپنی سرکاری حیثیت، عہدے یا اختیارات کو سیاسی فائدے کے لیے استعمال کرنے کی اجازت نہیں ہے۔
کمیشن کے مطابق یہ پابندیاں ان ریٹائرڈ افسران اور ملازمین پر بھی لاگو ہوں گی جو حکومت کی جانب سے کسی عہدے پر مقرر کیے گئے ہیں یا سبکدوشی کے بعد دوبارہ سرکاری ذمہ داریوں پر فائز ہیں۔ ایسے افراد کو بھی سیاسی غیر جانبداری برقرار رکھنی ہوگی اور کسی سیاسی جماعت یا امیدوار کی حمایت میں اپنے سرکاری اثر و رسوخ کا استعمال نہیں کرنا ہوگا۔
الیکشن کمیشن نے وضاحت کی ہے کہ ریٹائرڈ سرکاری ملازمین کے سیاسی طرز عمل سے متعلق الگ اور واضح ضابطوں کی عدم موجودگی کے پیش نظر ان پر بھی وہی پابندیاں نافذ کی گئی ہیں جو خدمات انجام دینے والے سرکاری ملازمین کے لیے مقرر ہیں۔ کمیشن نے متعلقہ ریاستی سروس رولز کا حوالہ دیتے ہوئے کہا ہے کہ سرکاری ملازمین سیاسی سرگرمیوں اور انتخابی عمل میں حصہ نہیں لے سکتے۔
کمیشن نے یہ بھی واضح کیا کہ مثالی ضابطۂ اخلاق کا اطلاق ان تنظیموں، کمیٹیوں، کارپوریشنوں اور کمیشنوں پر بھی ہوتا ہے جنہیں حکومت مکمل یا جزوی طور پر مالی امداد فراہم کرتی ہے۔ ان اداروں سے وابستہ ملازمین بھی انتخابی ضابطے کی پابندی کے پابند ہوں گے۔ کسی سیاسی جماعت، امیدوار یا گروپ کو دوسروں کے مقابلے میں فائدہ پہنچانے کے لیے سرکاری عہدے اور اختیارات کا استعمال ممنوع ہوگا۔
الیکشن کمیشن نے انتخابی حلقوں میں سرکاری اجلاسوں کے انعقاد سے متعلق بھی ہدایات جاری کی ہیں۔ کمیشن کے مطابق جن حلقوں میں انتخابات کا اعلان ہو چکا ہے، وہاں انتخابی افسران کو کسی سرکاری تبادلۂ خیال یا اجلاس کے لیے نہیں بلایا جا سکے گا۔ ان افسران کے ساتھ ویڈیو کانفرنس یا کسی دوسرے ذریعے سے سرکاری اجلاس منعقد کرنے پر بھی پابندی عائد ہوگی۔
الیکشن کمیشن نے متعلقہ ریاستی انتظامیہ کو ہدایت دی ہے کہ ان احکامات سے تمام متعلقہ افسران اور ملازمین کو واقف کرایا جائے اور ان پر سختی سے عمل درآمد یقینی بنایا جائے۔ کمیشن نے خبردار کیا ہے کہ انتخابی ضابطۂ اخلاق کی خلاف ورزی یا اس سلسلے میں کسی بھی قسم کی کوتاہی کو سنجیدگی سے لیا جائے گا۔
اردو دنیا نیوز — ہر خبر آپ کے ساتھ!
تازہ خبروں اور خصوصی ویڈیوز کے لیے ہمارے واٹس ایپ گروپ، یوٹیوب چینل اور موبائل ایپ سے جڑیں
