دہلی میں فضائی آلودگی بے قابو، کئی علاقوں میں اے کیو آئی 400 تک پہنچا،

نئی دہلی، 10 نومبر (اردو دنیا نیوز/ایجنسیز)دہلی کی فضا زہریلی آلودگی کی لپیٹ میں ہے، جہاں کئی علاقوں میں ایئر کوالٹی انڈیکس (اے کیو آئی) انتہائی خراب سطح پر پہنچ گیا ہے۔ چاندنی چوک میں اے کیو آئی 400 ریکارڈ کیا گیا، جبکہ پوسا میں یہ 398 تک جا پہنچا۔ فضائی آلودگی کی سنگین صورتحال کے درمیان سپریم کورٹ نے بھی سخت موقف اختیار کرتے ہوئے دہلی سمیت چار ریاستوں سے دو ہفتوں کے اندر آلودگی پر قابو پانے کے لیے تفصیلی ایکشن پلان طلب کرلیا ہے۔

مرکزی آلودگی کنٹرول بورڈ (سی پی سی بی) کے 10 نومبر کی صبح 6 بجے تک کے اعداد و شمار کے مطابق دہلی کے متعدد علاقوں میں اے کیو آئی 300 سے تجاوز کرچکا ہے۔ چاندنی چوک میں سب سے زیادہ 400، پوسا (آئی آئی ٹی ایم) میں 398، نارتھ کیمپس میں 376 اور سری فورٹ میں 375 اے کیو آئی درج کیا گیا۔ اسی طرح براڑی کراسنگ میں 364، آئی ٹی آئی دہلی اور پنجابی باغ میں 361، جبکہ آیا نگر میں 360 ریکارڈ کیا گیا۔

دیگر علاقوں میں منڈکا کا اے کیو آئی 342، آر کے پورم کا 327، لودھی روڈ کا 324، وزیر پور کا 310 اور روہنی کا 307 رہا۔ بدرپور میں 294، آنند وہار میں 292، اشوک وہار میں 282، نریلا میں 277، جواہر لعل نہرو اسٹیڈیم میں 272 اور علی پور میں 261 اے کیو آئی درج کیا گیا۔ ان اعداد و شمار سے ظاہر ہوتا ہے کہ راجدھانی کے بیشتر علاقے فضائی آلودگی کی انتہائی خراب صورتحال سے دوچار ہیں۔

اے کیو آئی کے مطابق 0 سے 50 تک ہوا کا معیار اچھا، 51 سے 100 اطمینان بخش، 101 سے 200 درمیانہ، 201 سے 300 خراب، 301 سے 400 انتہائی خراب اور 401 سے 500 سنگین زمرے میں شمار ہوتا ہے۔ آلودگی کی موجودہ سطح کے باعث شہریوں کو آنکھوں میں جلن، کھانسی، گلے میں خراش اور سانس لینے میں دشواری جیسی شکایات کا سامنا کرنا پڑ رہا ہے۔

دہلی میں آلودگی پر قابو پانے کے لیے گریڈیڈ رسپانس ایکشن پلان (جی آر اے پی) کے تیسرے مرحلے کی پابندیاں بھی نافذ ہیں۔ 6 نومبر سے نافذ ان پابندیوں کے تحت غیر ضروری تعمیراتی اور انہدامی سرگرمیوں پر روک لگائی گئی ہے۔ اس کے علاوہ دہلی اور این سی آر کے مقررہ اضلاع میں بی ایس-3 پٹرول اور بی ایس-4 ڈیزل انجن والی چار پہیہ گاڑیوں کی آمد و رفت پر پابندی عائد ہے۔ پرائمری جماعتوں کے لیے ہائبرڈ طریقۂ تعلیم اختیار کرنے کی اجازت بھی دی گئی ہے۔

جی آر اے پی کے پہلے اور دوسرے مرحلے کے تحت نافذ اقدامات بھی جاری ہیں، جن میں مشینوں کے ذریعے سڑکوں کی صفائی، پانی کا چھڑکاؤ اور گرد و غبار پر قابو پانے کے اقدامات شامل ہیں۔ ماہرین نے خبردار کیا ہے کہ آلودہ ہوا میں طویل عرصے تک سانس لینے سے پھیپھڑوں اور نظام تنفس سے متعلق مسائل پیدا ہوسکتے ہیں۔ بچوں، بزرگوں اور دمے کے مریضوں کو خصوصی احتیاط برتنے کا مشورہ دیا گیا ہے۔

سپریم کورٹ کی چار ریاستوں کو دو ہفتوں میں رپورٹ پیش کرنے کی ہدایت

دہلی-این سی آر میں فضائی آلودگی اور گاڑیوں سے خارج ہونے والے دھوئیں کے معاملے پر سپریم کورٹ نے دہلی، ہریانہ، اتر پردیش اور راجستھان کی حکومتوں سے تفصیلی ایکشن پلان طلب کیا ہے۔ چیف جسٹس سوریہ کانت، جسٹس جوائے مالیہ باگچی اور جسٹس وی موہنا پر مشتمل بنچ نے متعلقہ حکومتوں اور اداروں کو ہدایت دی کہ وہ گاڑیوں سے ہونے والی آلودگی کو روکنے کے لیے کیے گئے اقدامات اور مستقبل کی حکمت عملی عدالت کے سامنے پیش کریں۔

عدالت نے دہلی حکومت، میونسپل کارپوریشن دہلی (ایم سی ڈی) اور دہلی ٹریفک پولیس سمیت متعلقہ حکام سے گاڑیوں کے اخراج کے مقررہ معیارات پر عمل درآمد کی تفصیلات طلب کی ہیں۔ اس کے علاوہ آلودگی کنٹرول سرٹیفکیٹ (پی یو سی) کے قواعد پر سختی سے عمل کرانے اور پرانی یا مقررہ ماحولیاتی معیار پر پوری نہ اترنے والی گاڑیوں کے خلاف کارروائی کی معلومات بھی مانگی گئی ہیں۔

سپریم کورٹ نے یہ بھی دریافت کیا ہے کہ اب تک کتنی گاڑیوں کی جانچ کی گئی، کتنے چالان جاری ہوئے اور خلاف ورزی کرنے والوں کے خلاف کیا اقدامات کیے گئے۔ عدالت نے چاروں ریاستوں کو جواب داخل کرنے کے لیے دو ہفتوں کی مہلت دی ہے۔ اس معاملے کی اگلی سماعت 23 نومبر کو مقرر کی گئی ہے۔