گورکھپور: زخمی دلہن آئی سی یو میں داخل، دولہا بارات لے کر اسپتال پہنچا، وہیں ہوئی شادی

گورکھپور 14 مئی:(اردودنیا.اِن/ایجنسیاں) اتر پردیش کے گورکھپور ضلع میں ایک انوکھی اور جذباتی شادی نے سب کی توجہ حاصل کر لی، جہاں زخمی دلہن اسپتال کے آئی سی یو میں داخل تھی اور دولہا بارات لے کر سیدھا اسپتال پہنچ گیا۔ ڈاکٹروں کی موجودگی میں دلہن کی مانگ بھر کر شادی کی رسم ادا کی گئی۔

گورکھپور کے بانسگاؤں علاقے کے ہٹوار گاؤں کی رہنے والی پوجا یادو اور مہوا کے سنی یادو کی شادی 13 مئی 2026 کو طے تھی۔ شادی کے دن صبح پوجا یادو اپنے بھائی کے ساتھ ایل ایل بی فائنل سمسٹر کا امتحان دینے سنت کبیر نگر گئی تھیں۔ امتحان کے بعد واپس آتے وقت دوپہر کے قریب انہیں اچانک چکر آیا اور وہ موٹر سائیکل سے گر گئیں۔

حادثے میں ان کے سر پر شدید چوٹ آئی اور زیادہ خون بہنے کے باعث انہیں فوری طور پر گورکھپور کے ایک اسپتال منتقل کیا گیا، جہاں ڈاکٹروں نے حالت نازک دیکھتے ہوئے آئی سی یو میں داخل کر لیا۔ شادی کی خوشیوں کے درمیان پیش آئے اس حادثے سے دونوں خاندانوں میں تشویش پھیل گئی۔

دلہن کے زخمی ہونے کی اطلاع ملتے ہی دولہا سنی یادو اور ان کے اہل خانہ اسپتال پہنچ گئے۔ ڈاکٹروں نے بتایا کہ پوجا خطرے سے باہر ہیں، تاہم انہیں فوری طور پر ڈسچارج نہیں کیا جا سکتا۔ اس کے بعد دونوں خاندانوں نے اسپتال میں ہی شادی کی رسومات ادا کرنے کا فیصلہ کیا۔

سنی یادو دولہا کے لباس میں بارات کے ساتھ اسپتال پہنچے۔ آئی سی یو میں بستر پر لیٹی پوجا یادو کی مانگ میں سندور بھرا گیا، جبکہ پنڈت نے منتر پڑھ کر شادی کی رسم مکمل کرائی۔ اس موقع پر اسپتال کا ماحول جذباتی مناظر سے بھر گیا۔

بعد ازاں اسپتال میں سندور دان کی رسم مکمل ہونے کے بعد دولہا اپنے گاؤں واپس لوٹ گیا، جہاں شادی کی دیگر رسومات ادا کی گئیں۔ بتایا گیا ہے کہ سنی یادو بی اے مکمل کر چکے ہیں اور اس وقت ملازمت کی تیاری کر رہے ہیں۔

اس منفرد شادی کا پورے گورکھپور اور اطراف کے علاقوں میں چرچا ہو رہا ہے۔ مشکل حالات میں دولہے کی جانب سے اپنی دلہن کا ساتھ نہ چھوڑنے کے جذبے کو لوگ سراہ رہے ہیں۔