سنگاریڈی:بیوی پر شک میں شوہر درندہ بن گیا، کلہاڑی سے دونوں ٹانگیں کاٹ ڈالیں

تلنگانہ/سنگاریڈی 14 مئی:(اردودنیا.اِن/ایجنسیاں) سنگاریڈی ضلع کے پُلکل منڈل کے گنگوجی پیٹ گاؤں میں ایک دل دہلا دینے والا واقعہ سامنے آیا ہے جہاں ایک شوہر نے اپنی بیوی پر بے رحمی سے کلہاڑی سے حملہ کر دیا۔ اس حملے میں خاتون شدید زخمی ہو گئی اور اس کی دونوں ٹانگیں کاٹ دی گئیں۔

اطلاعات کے مطابق دُرگیا اور ویرامنی گزشتہ کئی برسوں سے ازدواجی زندگی گزار رہے تھے۔ حالیہ دنوں میں شوہر کو اپنی بیوی کے کردار پر شک ہونے لگا تھا۔ اسی معاملے پر دونوں کے درمیان اکثر جھگڑے ہوتے رہتے تھے۔میاں بیوی کے درمیان شدید تکرار ہوئی جس کے بعد دُرگیا غصے میں بے قابو ہو گیا۔

بتایا جا رہا ہے کہ جھگڑا بڑھنے پر دُرگیا نے گھر میں موجود کلہاڑی اٹھا لی اور بیوی پر حملہ کر دیا۔ ویرامنی سنبھل پاتی اس سے پہلے ہی اس نے انتہائی بے رحمی کے ساتھ اس کی دونوں ٹانگوں پر وار کیے۔ خاتون کی چیخ و پکار سن کر مقامی افراد موقع پر پہنچے تو وہ خون میں لت پت بے ہوش پڑی تھی۔

پڑوسیوں نے فوری طور پر زخمی خاتون کو علاج کے لیے حیدرآباد کے امیرپیٹ میں واقع ایک نجی اسپتال منتقل کیا جہاں اس کی حالت تشویشناک بتائی جا رہی ہے۔ ڈاکٹروں کی ٹیم اس کی جان بچانے کی کوشش میں مصروف ہے۔

اس دردناک واقعہ کو دیکھ کر دنگ رہ جانے والے جوڑے کے بیٹے نے ہمت دکھاتے ہوئے پُلکل پولیس اسٹیشن پہنچ کر اپنے والد کے خلاف شکایت درج کرائی۔ اس نے پولیس سے مطالبہ کیا کہ اس کی ماں پر انسانیت سوز حملہ کرنے والے ملزم کو سخت سزا دی جائے۔

پولیس نے متاثرہ خاتون کے بیٹے کی شکایت پر مقدمہ درج کر لیا ہے۔ واردات کے بعد ملزم دُرگیا فرار بتایا جا رہا ہے جبکہ پولیس اس کی تلاش میں مختلف مقامات پر چھاپے مار رہی ہے۔