حیدرآباد میں ناقص اشیاء کے استعمال پر مٹھائی کی 5 دکانیں مہر بند,3,546 کلو سے زائد غذائی اشیاء ضبط۔
حیدرآباد میں فوڈ سیفٹی حکام کی مٹھائی کی دکانوں پر کارروائی
حیدرآباد: دیوالی کے تہوار کے پیش نظر تلنگانہ میں فوڈ سیفٹی حکام نے مٹھائی تیار کرنے والی دکانوں اور فروختی مراکز کے خلاف کارروائی تیز کردی ہے۔ تازہ معائنے کے دوران غذائی تحفظ کے ضوابط کی خلاف ورزیوں اور لائسنس سے متعلق بے قاعدگیوں کے معاملے میں پانچ مٹھائی کی دکانوں کو مہر بند کردیا گیا، جبکہ 3,546.5 کلوگرام غذائی اشیاء ضبط کی گئیں، جن کی مجموعی مالیت 16 لاکھ 86 ہزار 18 روپے بتائی گئی ہے۔
تلنگانہ کی اسٹینڈرڈس اتھارٹی فار فوڈ اینڈ اسنشل ڈرگس (ٹی جی سیف) کی جانب سے بدھ کے روز حیدرآباد کے کیور (CURE) ریجن میں مٹھائی تیار کرنے والے یونٹس اور فروختی مراکز پر خصوصی معائنے کیے گئے۔ اس کارروائی میں فوڈ سیفٹی افسران اور پولیس پر مشتمل 13 ٹیموں نے مجموعی طور پر 16 اداروں کی جانچ کی۔ معائنے کے دوران مختلف مقامات پر صفائی کے ناقص انتظامات، کیڑوں کی موجودگی اور غذائی تحفظ کے مقررہ اصولوں کی خلاف ورزیوں کا انکشاف ہوا۔
ٹی جی سیف کے کمشنر اویناش موہنتی کے مطابق، ملاوٹ کے شبہ میں 22 غذائی نمونے حاصل کیے گئے۔ حکام نے بعض اداروں میں ایف ایس ایس اے آئی (FSSAI) لائسنس نہ ہونے یا کاروبار کے لیے ناموزوں زمرے کا لائسنس رکھنے کی نشاندہی کی۔ اس کے علاوہ فرش اور دیواروں کی ناقص صفائی، بند نالیاں، کاکروچ، مکھیوں اور چوہوں کی موجودگی جیسے مسائل بھی سامنے آئے۔
معائنے کے دوران بعض مقامات پر میعاد ختم ہونے کے باوجود غذائی اشیاء استعمال کیے جانے اور مٹھائیوں کو اخبار میں لپیٹنے کے معاملات بھی پائے گئے۔ بعض اداروں میں ملازمین کے لیے دستانے اور ہیئر نیٹ استعمال کرنے کا انتظام نہیں تھا، جبکہ پیسٹ کنٹرول اور ملازمین کی صحت سے متعلق ضروری ریکارڈ بھی دستیاب نہیں پایا گیا۔
حکام نے بغیر لائسنس کاروبار کرنے یا غیر صحت بخش حالات میں غذائی اشیاء تیار کرنے اور فروخت کرنے کے معاملے میں بالاجی سویٹس، چمپاپیٹ؛ ممتا سویٹ ہاؤس، سکندرآباد؛ ایس کے فوڈس، کاٹے دھن؛ حمیدی کنفیکشنرز، معظم جاہی مارکیٹ؛ اور اناپورنا کیٹررس، چوڑی بازار کو مہر بند کردیا۔
اس کے علاوہ آگرہ مٹھائی گھر ریسٹورنٹ، چارمینار؛ جی پُلا ریڈی سویٹس، صنعت نگر؛ سویٹ ون رچولو، ونستھلی پورم؛ بالاجی سری کشن مٹھائی بھنڈار، شمشیر گنج؛ اور ہیرانی فوڈس (منروا سویٹس)، کاٹے دھن کے ایف ایس ایس اے آئی لائسنس معطل کرتے ہوئے کاروباری سرگرمیاں فوری طور پر روکنے کی ہدایت دی گئی۔
کارروائی کے دوران جی پُلا ریڈی سویٹس سے 3,133 کلوگرام غذائی اشیاء ضبط کی گئیں، جن کی مالیت 15 لاکھ 3 ہزار 582 روپے بتائی گئی ہے۔ حکام نے مزید سات اداروں کو وجہ بتاؤ نوٹس جاری کیے ہیں اور ضابطوں کی خلاف ورزیوں پر جرمانے عائد کرنے کے لیے مزید کارروائی کا اشارہ دیا ہے۔
فوڈ سیفٹی حکام کی اس مہم کا مقصد تہوار کے دوران عوام کو محفوظ اور معیاری غذائی اشیاء کی فراہمی یقینی بنانا اور مٹھائیوں کی تیاری و فروخت میں صفائی اور قانونی ضوابط کی پابندی کو نافذ کرنا ہے۔
