میسور:شادی سے قبل دلہن نے والدین سمیت خودکشی کر لی، نجی تصاویر لیک ہونے کا الزام

میسور 24 جون :(اردودنیا.اِن/ایجنسیز)کرناٹک کے ضلع میسور میں ایک دل دہلا دینے والا واقعہ پیش آیا جہاں شادی کی خوشیاں چند لمحوں میں ماتم میں بدل گئیں۔ 24 جون کو شادی کے بندھن میں بندھنے والی 21 سالہ لڑکی نے اپنے والدین کے ساتھ مبینہ طور پر زہر کھا کر زندگی کا خاتمہ کر لیا۔

پولیس کے مطابق خاندان شادی کی تیاریوں میں مصروف تھا، تاہم ایک نوجوان کی جانب سے لڑکی کی نجی تصاویر اس کے منگیتر کو بھیجے جانے کے بعد حالات یکسر تبدیل ہوگئے۔ تصاویر سامنے آنے پر دلہن اور اس کے منگیتر کے درمیان شدید اختلافات پیدا ہوئے جبکہ دونوں خاندانوں میں بھی کشیدگی بڑھ گئی۔

تحقیقات کے مطابق الاس گوڑا نامی نوجوان لڑکی سے شادی کرنا چاہتا تھا اور کافی عرصے سے اسے ہراساں کر رہا تھا۔ لڑکی اور اس کے اہل خانہ نے اس کی شادی کی پیشکش مسترد کر دی تھی، جس پر وہ ناراض تھا۔ پولیس کا کہنا ہے کہ 21 جون کو لڑکی کے والدین نے الاس گوڑا اور اس کے والدین کو گھر بلا کر سمجھانے کی کوشش کی اور اس سے موبائل فون میں موجود نجی تصاویر اور پیغامات حذف کرنے کا مطالبہ کیا۔

الزام ہے کہ نوجوان نے کچھ تصاویر محفوظ رکھیں اور بعد ازاں انہیں لڑکی کے منگیتر کو بھیج دیا۔ اس واقعے کے بعد رشتہ شدید بحران کا شکار ہو گیا اور شادی ٹوٹنے کا خدشہ پیدا ہوگیا، جس سے پورا خاندان ذہنی دباؤ میں مبتلا تھا۔

پولیس کے مطابق لڑکی، اس کی 44 سالہ والدہ اور 54 سالہ والد نے اپنے گاؤں کیمپینہونڈی میں زہر کھا لیا۔ تینوں کو اسپتال منتقل کیا گیا تاہم انہیں بچایا نہ جا سکا۔

پولیس نے بتایا کہ جائے وقوعہ سے ملنے والے سوسائڈ نوٹ میں الاس گوڑا کو ان اموات کا ذمہ دار قرار دیا گیا ہے۔ اس کے خلاف خودکشی پر اکسانے کا مقدمہ درج کر لیا گیا ہے جبکہ ملزم واقعے کے بعد سے فرار بتایا جا رہا ہے۔ پولیس مختلف پہلوؤں سے تحقیقات جاری رکھے ہوئے ہے۔