سہارنپور: لیاب ٹیکنیشن اور خاتون ٹیچر کی مشتبہ موت، محبت میں خودکشی کا شبہ
ولیس کو خاندانی مخالفت اور محبت کے رشتے کے باعث مبینہ خودکشی کا شبہ۔
سہارنپور:(اردودنیا.اِن/ایجنسیز) اتر پردیش کے ضلع سہارنپور میں محبت کے ایک افسوسناک انجام نے پورے شہر کو صدمے میں مبتلا کر دیا۔ صدر بازار تھانہ علاقے کی ایس بی آئی کالونی میں ایک لیاب ٹیکنیشن اور ایک نوجوان خاتون ٹیچر کی لاشیں کرائے کے کمرے سے برآمد ہوئیں۔ ابتدائی تحقیقات میں پولیس کو معاملہ محبت اور خودکشی سے جڑا ہوا معلوم ہو رہا ہے۔
پولیس کے مطابق 40 سالہ کامنیش، جو کیرالہ کے رہنے والے تھے، گزشتہ دس برس سے سہارنپور کے میڈی گرام اسپتال میں لیاب ٹیکنیشن کے طور پر کام کر رہے تھے۔ 24 سالہ آستھا گگل ہری علاقے کی رہائشی تھیں اور ایک پرائیویٹ انٹر کالج میں بطور ٹیچر خدمات انجام دے رہی تھیں۔ دونوں کے درمیان گزشتہ چار سال سے تعلقات تھے۔
تحقیقات میں سامنے آیا ہے کہ دونوں کی ملاقات آستھا کی والدہ کے علاج کے دوران اسپتال میں ہوئی تھی، جس کے بعد دونوں کے درمیان قربت بڑھ گئی۔
تحقیقات میں یہ بھی سامنے آیا کہ سام پہلے سے شادی شدہ تھا، اس کی بیوی کئی سال قبل کام کے سلسلے میں دہلی منتقل ہو گئی تھی۔ دوسری جانب آستھا کے اہل خانہ اس رشتے کے سخت مخالف تھے۔ دونوں کے درمیان عمر کا نمایاں فرق اور سام کی سابقہ شادی کو خاندان کی مخالفت کی بڑی وجوہات قرار دیا جا رہا ہے۔
پولیس نے دروازہ توڑ کر اندر داخل ہونے پر کامنیش کی لاش کو پھندے سے لٹکا ہوا پایا جبکہ اس کی کلائی کی نس بھی کٹی ہوئی تھی۔ آستھا کی لاش فرش پر پڑی تھی اور اس کے منہ سے جھاگ نکل رہی تھی، جس کے بعد شبہ ظاہر کیا جا رہا ہے کہ اس نے کوئی زہریلا مادہ استعمال کیا۔
اے ایس پی منوج کمار یادو کے مطابق فرانزک ٹیم نے موقع سے شواہد اکٹھے کر لیے ہیں اور دونوں لاشوں کو پوسٹ مارٹم کے لیے بھیج دیا گیا ہے۔ پولیس کا کہنا ہے کہ ابتدائی طور پر معاملہ محبت اور خودکشی کا معلوم ہوتا ہے، تاہم موت کی اصل وجہ پوسٹ مارٹم رپورٹ آنے کے بعد ہی واضح ہو سکے گی۔ پولیس تمام پہلوؤں سے تحقیقات جاری رکھے ہوئے ہے۔پولیس کی ابتدائی تفتیش کے مطابق، خاندانی مخالفت اور سماجی دباؤ ممکنہ طور پر اس جوڑے کے مبینہ خودکشی کے فیصلے کا سبب بنے۔
