وجے نے حکومت بنانے کا دعویٰ پیش کیا، کانگریس کی حمایت، اے آئی اے ڈی ایم کے کو بڑا دھچکا

چنئی 06 مئی:(اردودنیا.اِن/ایجنسیز) تمل ناڈو میں نئی حکومت کی تشکیل کے لیے سیاسی سرگرمیاں تیز ہو گئی ہیں۔ اداکار اور سیاستداں وجے نے گورنر سے ملاقات کر کے حکومت بنانے کا دعویٰ پیش کیا ہے۔ ان کی جماعت TVK نے کانگریس کی حمایت حاصل کر لی ہے، جس کے بعد ریاست کی سیاست میں بڑی تبدیلی دیکھی جا رہی ہے۔

ذرائع کے مطابق وجے نے ابھی تک 118 ارکان اسمبلی کی مکمل حمایت کا خط پیش نہیں کیا ہے۔ بتایا جا رہا ہے کہ ٹی وی کے نے گورنر کو 112 ارکان اسمبلی کے دستخط والا خط دیا، جس پر گورنر نے اکثریت ثابت کرنے کے لیے 118 دستخطوں کے ساتھ دوبارہ آنے کو کہا۔ پارٹی نے اس کے لیے مزید وقت مانگا ہے۔

ادھر کانگریس، جو کئی دہائیوں سے DMK کی اتحادی رہی ہے، نے اب وجے کی جماعت کی حمایت کا اعلان کر دیا ہے۔ کانگریس کے تمل ناڈو انچارج گریش چوڈانکر نے کہا کہ عوامی مینڈیٹ کا احترام کرتے ہوئے یہ فیصلہ لیا گیا ہے۔ تاہم کانگریس نے یہ بھی واضح کیا کہ آئین پر یقین نہ رکھنے والی فرقہ پرست طاقتوں کو اتحاد سے باہر رکھا جائے۔

ڈی ایم کے نے کانگریس کے اس فیصلے پر سخت ناراضی ظاہر کرتے ہوئے اسے “پیٹھ میں چھرا گھونپنے” کے مترادف قرار دیا ہے۔ دونوں جماعتوں کے درمیان 1971 سے مختلف ادوار میں سیاسی اتحاد قائم رہا تھا۔

ریاستی اسمبلی انتخابات کے نتائج نے سب کو حیران کر دیا۔ وجے کی جماعت ٹی وی کے نے اپنے پہلے ہی انتخاب میں شاندار کامیابی حاصل کرتے ہوئے 108 نشستیں جیت لیں اور سب سے بڑی جماعت بن کر ابھری۔ تمل ناڈو میں حکومت بنانے کے لیے 118 نشستوں کی ضرورت ہوتی ہے۔

انتخابی نتائج کے مطابق ایم کے اسٹالن کی ڈی ایم کے کو 59 نشستیں حاصل ہوئیں، جبکہ اے آئی اے ڈی ایم کے صرف 47 نشستوں پر کامیاب ہو سکی۔ کانگریس نے پانچ نشستیں جیتیں جبکہ دیگر جماعتوں کو محدود کامیابی ملی۔

یاد رہے کہ 2021 کے اسمبلی انتخابات میں ڈی ایم کے نے 133 نشستیں حاصل کی تھیں اور ایم کے اسٹالن وزیر اعلیٰ بنے تھے، لیکن اس بار سیاسی منظرنامہ مکمل طور پر بدل گیا ہے۔وجے نے پیرمبور اور تروچیراپلی ایسٹ اسمبلی حلقوں سے کامیابی حاصل کی، جبکہ ان کی جماعت نے تقریباً 35 فیصد ووٹ شیئر حاصل کر کے سیاسی مبصرین کو حیران کر دیا۔