ہندو بنگالیوں نے سی اے اے کے تحت شہریت کے لیے درخواست کیوں نہیں دی؟ ہیمنت بسوا سرما کی وضاحت

گوہاٹی:(اردودنیا.اِن/ایجنسیز) آسام کے وزیراعلیٰ ہیمنت بسوا سرما نے کہا ہے کہ ریاست کے ہندو بنگالیوں نے شہریت ترمیمی قانون (CAA) کے تحت شہریت کے لیے درخواست نہیں دی کیونکہ وہ خود کو پہلے ہی بھارتی شہری مانتے ہیں۔

ایک پریس کانفرنس سے خطاب کرتے ہوئے ہیمنت بسوا سرما نے کہا:”ہندو بنگالیوں کو غیر ملکی سمجھنے کی کوئی وجہ نہیں ہے، وہ سب 1971 سے پہلے یہاں آچکے ہیں۔ سی اے اے کا آسام میں کوئی خاص مطلب نہیں بنتا۔”انہوں نے کہا کہ سابق وزیراعظم اندرا گاندھی نے 1971 میں انہیں آسام لایا تھا اور اس وقت یہ نہیں کہا گیا تھا کہ انہیں واپس بھیج دیا جائے گا۔

وزیراعلیٰ نے انکشاف کیا کہ اب تک صرف 12 درخواستیں دائر کی گئی ہیں جن میں سے صرف 3 افراد کو شہریت دی گئی ہے۔ انہوں نے کہا کہ "ہندو بنگالی اس بات پر پُراعتماد ہیں کہ وہ بھارتی ہیں، اس لیے انہوں نے سی اے اے کے تحت درخواست دینا ضروری نہیں سمجھا۔”

سرما نے مزید بتایا کہ آسام میں سی اے اے کے خلاف احتجاج کے دوران 5 افراد ہلاک ہوئے تھے، لیکن اس کے باوجود صرف 12 افراد نے درخواست دی۔ نئی امیگریشن اینڈ فارنرز (ایگزمپشن) آرڈر 2025 کے نفاذ کے بعد کوئی نئی درخواست سامنے نہیں آئی۔ اس آرڈر کے مطابق افغانستان، بنگلہ دیش اور پاکستان سے تعلق رکھنے والے اقلیتی افراد — ہندو، سکھ، بدھ مت، جین، پارسی اور عیسائی — جو 31 دسمبر 2024 تک بھارت آئے ہیں، وہ پاسپورٹ یا سفری دستاویزات کے بغیر یہاں رہ سکتے ہیں۔

خیال رہے کہ سی اے اے کے تحت 31 دسمبر 2014 تک آنے والے اقلیتی افراد کو بھارتی شہریت دینے کا قانون بنایا گیا تھا۔ادھر آل آسام اسٹوڈنٹس یونین (AASU) اور اپوزیشن جماعتوں نے الزام عائد کیا ہے کہ مرکز نے آسام کے ساتھ دھوکہ کیا ہے، کیونکہ آسام معاہدہ (1985) کے تحت غیر ملکیوں کی نشاندہی اور ملک بدری کے لیے 25 مارچ 1971 کی تاریخ مقرر کی گئی تھی، لیکن سی اے اے نے اسے 2014 تک بڑھایا، جبکہ اب نیا آرڈر 2024 تک کے لوگوں کو تحفظ دیتا ہے۔

اپوزیشن کا کہنا ہے کہ یہ بی جے پی حکومت کی "چال” ہے تاکہ بنگلہ دیش سے آئے ہندو بنگالیوں کو شہریت دی جا سکے۔ واضح رہے کہ آسام معاہدہ 15 اگست 1985 کو چھ سالہ پُرتشدد تحریک کے بعد ہوا تھا جس میں ہزاروں جانیں ضائع ہوئیں۔