کولکتہ ایئرپورٹ پر ممبئی جانے والی ایئر انڈیا کی پرواز کو ہائی جیک کی دھمکی، ٹیک آف سے قبل مچا ہنگامہ

کولکتہ، 11 نومبر (اردو دنیا نیوز/ایجنسیز) مغربی بنگال کے کولکتہ ایئرپورٹ پر بدھ کی صبح اس وقت سیکیورٹی حکام میں ہلچل مچ گئی جب ممبئی جانے والی ایئر انڈیا کی پرواز میں ہائی جیک کی دھمکی سے متعلق پیغام ملا۔ طیارے کے ٹوائلٹ میں موجود شیشے پر دھمکی آمیز نوٹ ملنے کے بعد فوری طور پر ہائی جیک الرٹ جاری کردیا گیا اور پرواز کو ٹیک آف سے قبل آئسولیشن بے میں منتقل کردیا گیا۔

اطلاعات کے مطابق یہ واقعہ کولکتہ کے نیتا جی سبھاش چندر بوس بین الاقوامی ہوائی اڈے پر پیش آیا۔ طیارہ ممبئی روانہ ہونے کی تیاری کررہا تھا کہ اس کے ٹوائلٹ کے شیشے پر ایک دھمکی آمیز پیغام نظر آیا۔ معاملے کی سنگینی کو دیکھتے ہوئے پائلٹ نے فوری طور پر ایئر ٹریفک کنٹرول (اے ٹی سی) کو اطلاع دی، جس کے بعد ایئرپورٹ انتظامیہ نے ہنگامی حفاظتی اقدامات شروع کردیے۔

اطلاع ملتے ہی طیارے کو الگ تھلگ آئسولیشن بے میں کھڑا کردیا گیا، جہاں سینٹرل انڈسٹریل سیکیورٹی فورس (سی آئی ایس ایف) اور ایئرپورٹ کے خصوصی سیکیورٹی اہلکاروں نے تلاشی کا عمل شروع کیا۔ سیکیورٹی ٹیمیں طیارے کے اندر موجود سامان اور دیگر مقامات کی باریک بینی سے جانچ کررہی ہیں تاکہ کسی بھی مشتبہ شے کی موجودگی کا پتہ لگایا جاسکے۔

سرکاری ذرائع کے مطابق طیارے کے ٹوائلٹ میں دھمکی آمیز نوٹ ملنے کے بعد ایئرپورٹ پر آپریشنز کنٹرول میٹنگ بھی منعقد کی گئی۔ حکام نے مقررہ حفاظتی ضابطوں کے تحت کارروائی شروع کی ہے اور پورے معاملے کو سنجیدگی سے دیکھا جارہا ہے۔

تحقیقاتی ایجنسیاں طیارے میں سفر کرنے والے مسافروں کی فہرست اور ایئرپورٹ کے مختلف حصوں میں نصب سی سی ٹی وی کیمروں کی فوٹیج کا بھی جائزہ لے رہی ہیں۔ اس بات کا پتہ لگانے کی کوشش کی جارہی ہے کہ دھمکی آمیز پیغام کس نے اور کن حالات میں لکھا تھا۔

فی الحال سیکیورٹی اداروں کی جانب سے طیارے کی مکمل جانچ جاری ہے۔ حکام کی تحقیقات اور سرکاری وضاحت کے بعد ہی دھمکی کی نوعیت اور اس سے متعلق دیگر تفصیلات سامنے آسکیں گی۔