جنوبی افریقہ کے خلاف ٹیسٹ سیریز کے لئے آسٹریلیائی ٹیم کا اعلان ،ناقص کارکردگی کی وجہ سے میتھوویڈ باہر
سڈنی: (اردودنیا.اِن) میتھیو ویڈ کو جنوبی افریقہ کے خلاف آئندہ سیریز کے لئے آسٹریلیائی ٹیسٹ ٹیم سے باہرکردیا گیا ہے۔ ویڈ کو جنوبی افریقہ کے خلاف کھیلنے کے لئے 19 رکنی ٹیم میں شامل نہیں کیا گیا ، لیکن وہ نیوزی لینڈ سے ٹی 20 سیریز کھیلنے والی ٹیم میں شامل ہیں۔ یہ دورہ مارچ میں ہوگا ، حالانکہ ابھی تک مجوزہ ٹیسٹ سیریز کی تصدیق نہیں ہوئی ہے۔
ایلکس کیری کو کپتان ٹم پین کے ساتھ ریزرو وکٹ کیپر کے طور پربرقرار رکھا گیا ہے۔ اسی کے ساتھ ہی ٹریوس ہیڈ کو ویڈ کی جگہ پر منتخب کیا گیا ، جن کا برسبین میں ہندوستان کے خلاف آخری ٹیسٹ میں انتخاب نہیں ہوا تھا۔ آرون فنچ ٹی 20 ٹیم کے کپتان ہوں گے۔کرکٹ آسٹریلیا نے بدھ کے روز کہا کہ ٹیسٹ سیریز کا شیڈول تبدیل ہونے پر بھی ٹی 20 ٹیم تبدیل نہیں کی جائے گی۔
چار میچوں کی ٹیسٹ سیریز میں ہندوستان نے آسٹریلیا کو 2-1سے شکست دی تھی۔وہیں جنوبی افریقہ کی ٹیم پاکستان میں دو ٹیسٹ میچوں کی سیریز کھیل رہی ہے۔ٹم پین کو بطور کپتان برقرار رکھنے پر قومی سلیکٹر ٹریور ہینس نے کہا کہ پین ابھی بھی کپتانی کے حقدار ہیں۔ انہوں نے کہا کہ ٹم پین ساتویں نمبر پر ہندوستان کے خلاف بہتر تھے اور ان میں ٹیم کو ایک بلے باز وکٹ کیپر اور کپتان کی حیثیت سے پیش کرنے کے لئے بہت کچھ ہے۔کرکٹ آسٹریلیا کی قومی ٹیم کے سربراہ بین اولیور نے بھی بطور کپتان پین کی حمایت کی ۔
