ٹیکساس والمارٹ میں 23 افراد قتل کرنے والے کو 90 مرتبہ عمر قید کی سزا سنا دی گئی

نیویارک، 8جولائی :(اردودنیانیوز.کام/ایجنسیز) امریکہ میں ایک وفاقی جج نے 2019 میں ٹیکساس والمارٹ   El paso Walmart میں فائرنگ کرکے 23 افراد کو قتل اور 22 کو زخمی کرنے والے سفید فام بالادستی پر یقین رکھنے والے نوجوان کو مسلسل 90 مرتبہ عمر قید کی سزا سنا دی۔جمعہ کے روز ایل پاسو میں امریکی ڈسٹرکٹ جج ڈیوڈ گوڈراما کی طرف سے سنائی گئی سزا فروری سے ایک درخواست کے معاہدے کی پاسداری کرتی ہے جس میں 24 سالہ شوٹر پیٹرک کروسیئس Patrick Crusius نے جرم قبول کیا اور وفاقی سزائے موت سے بچنے کے لیے مسلسل 90 عمر قید کی سزا پر رضامندی ظاہر کی۔ شوٹر کو اب بھی ٹیکساس ریاست کے الزامات کا سامنا ہے جس کے نتیجے میں سزائے موت ہو سکتی ہے۔

اس کی سزا سے قبل عدالت میں فائرنگ میں زخمی ہونے والوں اور مرجانے والوں کے لواحقین نے دو روز تک جذباتی بیانات دیے۔ شوٹر کی موجودگی میں ان بیانات نے بڑا اثر مرتب کیا۔جینیس ڈیویلا نے عدالت میں کہا کہ میں تمہیں مارنا چاہتی ہوں۔ جینیس فائرنگ کے وقت 12 سال کی تھی اور اس واقعہ میںاس کا فٹ بال کوچ مارا گیا تھا اور اس کے والد زخمی ہوئے تھے۔ جینیس نے مزید کہا میں تم سے بہت نفرت کرتی ہوں، جہنم میں آپ کے لیے ایک خاص جگہ ہے۔ اس بیان کو مقامی ٹی وی نے لائیو نشر کیا۔واقعہ میں اپنے والد الیگزینڈر ہوفمین کو کھو دینے والے تھامس ہوفمین نے عدالت میں شوٹر کو مخاطب کرکے کہا شریر بچے، تم اپنے ہتھیار کے بغیر کچھ بھی نہیں ہو۔یہ واقعہ سرحدی شہر ایل پاسو میں 3 اگست 2019 کو قتل عام کو انجام دیا گیا۔ شوٹر نے اے کے 47 سے فائرنگ کی تھی۔حملے سے ٹھیک پہلے شوٹر نے انٹرنیٹ پر ایک منشور پوسٹ کیا تھا جس میں اس نے اعلان کیا کہ یہ حملہ ٹیکساس پر ہسپانوی حملے کا جواب ہے۔ میں صرف اپنے ملک کی ثقافتی اور نسلی تبدیلی کے خلاف لڑ رہا ہوں۔