احتیاط و علاج,سردیوں میں آنکھوں کی خشکی-ڈاکٹر قرۃ العین فاطمہ عثمان دہلی
احتیاطی تدابیر اور گھریلو علاج
موسمی تبدیلیوں، تیز خشک ہواؤں، سرد درجہ حرارت، ہیٹر کی وجہ سے استعمال اور نمی کی خشک آنکھوں کا مسئلہ پیدا ہوسکتا ہے اور یہ کوئی غیرمعمولی بات نہیں عام بات ہے ایسا اکثر ہوجاتا ہے۔ موسم سرمامیں عام طور پر آب و ہوا میں نمی کی کمی یا خشک موسم کی وجہ سے جلد کے ساتھ ساتھ آنکھیں خشک ہونے کی شکایت بھی ہوجاتی ہے۔
یہ اتنی گھمبیر بات نہیں کچھ احتیاطی تدابیر اور گھریلو علاج سے اس مسئلے پر قابو پایا جاسکتاہے۔ ذیل میں چند طریقے پیش کئے جارہے ہیں۔ جنھیں اختیار کرکے خشک آنکھوں کی تکلیف کو کم کیا جا سکتا ہے۔ لیکن اگر احتیاط اور گھریلو علاج سے استفادہ نہ ہوتو ڈاکٹر سے معائنہ کرانا اور اس کی ہدایات پر عمل کرنا ضروری ہے۔
مرض دائمی ہوسکتا ہے
آنکھیں خشک ہونے کی شکایت عارضی یا دائمی بھی ہوسکتی ہے۔ عارضی یعنی تھوڑے عرصے اور دائمی طویل عرصہ تک، دائمی طور پر آنکھیں خشک ہونیکی شکایت تب پیدا ہوجاتی ہے جب آنکھ میں قدرتی نمی برقرار نہیں رہتی اور آنکھیں قدرتی آنسو پیدا نہیں کر پاتیں۔
کمپیوٹر اسکرین بھی اہم سبب
آنکھیں خشک ہونیکی ایک وجہ زیادہ دیر تک یا لگاتار کمپیوٹر اسکرین پر نظروں کا جمانا، ویڈیوز گیمز کھیلنا اور پڑھنا بھی ہے۔ کافی دیر تک کمپیوٹر اسکرین پر کام کرنے سے آنکھیں خشک ہوجاتی ہیں۔ ان کی نمی ختم ہوجاتی ہے اس لئے کمپیوٹر اسکرین پر سے کچھ دیر نظر ہٹا کر تقریباً بیس سیکنڈ تک ارد گرد پر نظر ڈالنی چاہئے اگر سبز پودوں کو اور درختوں پر نظر ڈالی جائے تو زیادہ بہتر ہے۔ اسی طرح پڑھتے، وڈیوگیمز کھیلتے اور کمپیوٹر استعمال کرتے وقت آنکھیں جھپکانا نہ بھولیں۔
ادویات بھی ایک سبب
نزلہ زکام کی انگریزی ادویات کے استعمال سے بھی آنکھیں خشک ہونیکی شکایت پیداہوسکتی ہے کیونکہ نزلہ زکام میں ہسٹامائنزپر مشتمل ادویات سے آنکھیں خشک ہونے کا مسئلہ درپیش ہو سکتاہے۔ اس لئے ایسی صورت میں نزلہ زکام کی ادویات کے استعمال کے ساتھ ساتھ آئی ڈراپس کی بھی ضرورت درپیش ہوتی ہے۔ اس کے علاوہ ہائی بلڈ پریشر اور اینٹی ڈپریشن ادویات سے بھی آنکھیں خشک ہونے کا امکان ہوتاہے۔ اس لئے دواؤں کا استعمال طبی معالج کے مشورہ سے استعمال کریں۔ اور ڈاکٹر کی اجازت کے بغیر ان ادویات کا استعمال بند نہ کریں۔
مضر مضرات
خشک آنکھوں کی وجہ سے آنکھوں میں خارش کی شکایت پیداہوجاتی ہے اور بعض اوقات یہ بہت تکلیف دہ صورتحال بھی اختیار کرلیتی ہے۔ آنکھوں کا خشک ہونا اگر چہ معمولی بات ہے لیکن اگریہ تکلیف زیادہ عرصے تک رہے تو آنکھوں کی سطح کو نقصان پہنچ سکتا ہے۔آنکھ کے انفیکشن کا خطرہ بڑھ سکتا ہے۔ اور اگر بروقت علاج نہ کیا جائے تو شدید خشک آنکھوں کے سبب آنکھوں میں سوجن، بینائی کی کمی قرنیہ کی سطح کو نقصان اور قرنیہ کا السر پیدا ہونے کا خطرہ ہو سکتا ہے۔ اگرچہ پانی پینے اور ہائیڈریٹ رہنے سے آنکھوں میں قدرتی آنسو زیادہ موثر طریقے سے پیدا ہونے میں مدد ملتی ہے۔ لیکن پھر بھی موسم کی تبدیلی آنکھوں پر مضر اثرات مرتب کرسکتی ہے۔
آئی ڈراپس
اس تکلیف کے علاج کے لئے کئی قسم کے آئی ڈراپس اور مرہم میڈیکل اسٹور پر دستیاب ہیں لیکن اس کیلئے کسی آنکھوں کے ڈاکٹر سے معائنہ کرانے کے بعد اس کی تجویز کردہ ہی دوا استعمال کرنا چاہئے۔ آنکھوں کا علاج خود سے نہیں کرنا چاہئے اور نہ ہی کسی معالج کے مشورے کے بغیر خود کوئی دوا آنکھوں میں نہیں ڈالنی چاہئے کیونکہ نقصان ہونے کا زیادہ اندیشہ اور خطرہ ہوتا ہے۔
اس لئے کسی اچھے آنکھوں کے طبی معالج سے معائنہ کرواکر اس کی ہدایت کے مطابق ہی دوا استعمال کریں۔ اگر آنکھوں میں زیادہ جلن اور تکلیف ہے اور سرخی ہے تو سرخی اور تکلیف کو کم کرنے کے لئے ایک واش کلاتھ کو نیم گرم پانی میں بھگو کر تقریباً آٹھ سے دس منٹ تک آنکھوں پر رکھیں۔ اس سے آنکھوں کی تکلیف میں افاقہ ہوگا اور انہیں سکون بھی ملے گا۔
اردو دنیا واٹس ایپ گروپ جوائین کرنے کے لئے لنک کلک کریںhttps://chat.whatsapp.com/2N8rKbtx47d44XtQH66jso |
اومیگا 3 فیٹی ایسڈ مفید
اومیگا 3 فیٹی ایسڈ پر مشتمل غذائیں خشک آنکھوں کی تکلیف کو کم کرتی ہیں۔ اس لئے اپنی خوراک میں اومیگا 3 فیٹی ایسڈ والی غذاؤں کو اپنی خوراک میں مناسب مقدار میں شامل کریں۔ اومیگا 3 فیٹی ایسڈ پر مشتمل غذائیں یا ڈاکٹر سے مشورہ کر کے غذائی سپلیمنٹس بھی لئے جا سکتے ہیں۔ غذائی سپلیمنٹس بھی خشک آنکھوں کی شکایت میں بہت مؤثر علاج ہے۔ لیکن اس کا استعمال بھی ڈاکٹر کے مشورے سے کرنا بہتر ہے۔
گرد و غبار سے بچاؤ
موسم سرما میں خشک ہوا اور گردوہ غبار آنکھوں کے خشک ہونیکا باعث بنتے ہیں۔ اس لئے آنکھوں کو اس تکلیف سے محفوظ رکھنے کے لئے گھر سے باہر نکلنے سے پہلے چشمے کا استعمال کریں تاکہ سردیوں کی خشک ہوا اور گردو غبار ڈائریکٹ آپ کی آنکھوں کو متاثر نہ کر سکے۔ اور آنکھیں خشک ہونے کی شکایت سے محفوظ رہ سکیں۔
احتیاطی تدابیر
موسم سرما میں گھر میں آب و ہوا کو نم رکھنے کے لئے ہیو میڈیفائر کا استعمال کیجئے۔ سگریٹ کا دھواں بھی آنکھوں کو خشک کرنے کا سبب بن سکتاہے۔ اس لئے اس سے اجتناب کریں۔ہیئر ڈرائر کے استعمال سے اجتناب کریں، ہیئر ڈرائر کی ائیربراہ راست آنکھوں پر پڑنے سے آنکھوں کی نمی خشک ہوتی ہے اس لئے بالوں کو ہوا سے خشک ہونے دیں۔پانی زیادہ پیا کریں، اگر آنکھوں میں کچھ بھاری پن یا ڈرائی نیس محسوس ہو تو سادے یا ٹھنڈے پانی سے آنکھوں کو اچھی طرح دھوئیں۔
کوئی بھی توجہ طلب کام کرتے وقت بھی آنکھوں کو چھپکانا نہ بھولیں۔یعنی زیادہ کثرت سے پلکیں جھپکائیں۔ وٹامن اے کی کمی سے بھی خشک آنکھوں کا مسئلہ ہوسکتاہے۔ اپنی خوراک میں وٹامن ڈی، بی 12 اور وٹامن اے والی غذاؤں کو شامل رکھیں۔ تمباکو نوشی سے پرہیز کریں۔ آنکھوں کو آرام دیں۔ سرمہ کا استعمال کریں، سوتے وقت سرمہ کا استعمال آنکھوں میں نمی اور بینائی کو بہتر بنانے میں معاون ہے۔
|
