افادیت,آلوچہ اور آلو بخارا -رافعہ عروہ بنگلور

تازہ آلوچہ اور خشک آلوبخارہ دونوں ہی غذائیت سے بھرپور پھل شمار ہوتے ہیں۔ ماہرین غذائیت کے مطابق یہ پھل جسم کو طاقت دینے کے ساتھ متعدد بیماریوں سے بچانے میں بھی اہم کردار ادا کرتے ہیں۔ آلوچے میں قدرتی اینٹی آکسیڈنٹس، فائبر، وٹامنز اور معدنی اجزا بڑی مقدار میں موجود ہوتے ہیں جو مجموعی صحت کو بہتر بناتے ہیں۔

آلوچہ قبض کے شکار افراد کیلئے نہایت مفید سمجھا جاتا ہے کیونکہ اس میں غذائی ریشے اور سوربیٹول نامی قدرتی مادہ پایا جاتا ہے جو نظامِ ہضم کو فعال رکھتا ہے۔ اس کے استعمال سے معدہ بہتر انداز میں کام کرتا ہے اور پیٹ کی صفائی میں مدد ملتی ہے۔

یہ پھل دل کی صحت کیلئے بھی انتہائی فائدہ مند مانا جاتا ہے۔ آلوچے میں پوٹاشیم، میگنیشیم اور اینٹی آکسیڈنٹس موجود ہوتے ہیں جو بلڈ پریشر کو متوازن رکھنے اور خراب کولیسٹرول کم کرنے میں مدد دیتے ہیں۔ اس کے نتیجے میں دل کے امراض، فالج اور شریانوں کی بیماریوں کا خطرہ کم ہو جاتا ہے۔

ماہرین کے مطابق آلوچے میں موجود پولی فینولز اور کلوروجینک ایسڈ خون میں شکر کی سطح کو متوازن رکھنے میں معاون ثابت ہوتے ہیں۔ یہی وجہ ہے کہ ذیابیطس کے مریض محدود مقدار میں اس پھل کا استعمال کر سکتے ہیں۔ آلوچہ چونکہ کم گلیسیمک انڈیکس والی غذا میں شامل ہے اس لئے یہ خون میں شوگر کی سطح اچانک نہیں بڑھاتا۔

وزن کم کرنے والے افراد کیلئے بھی آلوچہ مفید پھل سمجھا جاتا ہے۔ اس میں فائبر زیادہ جبکہ کیلوریز کم ہوتی ہیں جس سے زیادہ دیر تک پیٹ بھرا محسوس ہوتا ہے اور بھوک قابو میں رہتی ہے۔ یہی خصوصیت جسمانی وزن کو اعتدال میں رکھنے میں مدد دیتی ہے۔

آلوچے میں پائے جانے والے اینتھوسایانین نامی قدرتی رنگدار اجزا جسم میں موجود نقصان دہ فری ریڈیکلز کا خاتمہ کرتے ہیں۔ اس عمل سے جسم کینسر جیسی خطرناک بیماریوں سے محفوظ رہنے میں مدد حاصل کرتا ہے۔ یہ اجزا جسم میں سوزش کم کرنے میں بھی مددگار ثابت ہوتے ہیں جس سے جوڑوں کے درد اور دیگر تکالیف میں کمی آ سکتی ہے۔

ہڈیوں کی مضبوطی کیلئے بھی آلوچہ نہایت اہم غذا ہے۔ اس میں وٹامن کے، بورون اور کاپر جیسے اجزا موجود ہوتے ہیں جو ہڈیوں کو مضبوط رکھتے ہیں اور بڑھاپے میں ہڈیوں کے بھربھرے پن سے بچاتے ہیں۔ اس کے استعمال سے فریکچر کا خطرہ بھی کم ہو سکتا ہے۔

ذہنی صحت کے حوالے سے بھی آلوچہ مفید قرار دیا جاتا ہے۔ ماہرین کے مطابق اس میں شامل قدرتی مرکبات دماغی کارکردگی بہتر بنانے اور یادداشت کو مضبوط رکھنے میں مدد دیتے ہیں۔ بڑھتی عمر میں بھولنے کی بیماری اور ذہنی کمزوری کے امکانات کم ہو سکتے ہیں۔

آلوچے میں وٹامن سی کی بڑی مقدار جسم کے دفاعی نظام کو مضبوط بناتی ہے۔ یہ وٹامن جسم کو نزلہ، زکام، فلو اور دیگر موسمی بیماریوں سے بچانے میں مدد فراہم کرتا ہے۔ اسی لئے ماہرین متوازن مقدار میں آلوچہ یا آلوبخارہ روزمرہ غذا میں شامل کرنے کا مشورہ دیتے ہیں۔