اتر پردیش میں فاریسٹ گارڈ اور وائلڈ لائف گارڈ کی 708 آسامیوں پر بھرتی، 20 جولائی تک درخواستیں
اہل امیدوار 20 جولائی 2026 تک آن لائن درخواست دے سکتے ہیں
لکھنؤ:(اردودنیا.اِن/ایجنسیز) اتر پردیش ماتحت خدمات سلیکشن کمیشن (UPSSSC) نے فاریسٹ گارڈ اور وائلڈ لائف گارڈ کے 708 عہدوں پر بھرتی کے لیے آن لائن درخواستوں کا آغاز کر دیا ہے۔ اس بھرتی مہم کے تحت امیدوار 20 جولائی 2026 تک درخواست جمع کرا سکتے ہیں۔
کمیشن کی جانب سے جاری نوٹیفکیشن کے مطابق، کل 708 آسامیوں میں 318 فاریسٹ گارڈ، 10 وائلڈ لائف گارڈ، خصوصی انتخاب کے تحت 329 فاریسٹ گارڈ اور 51 وائلڈ لائف گارڈ کی آسامیاں شامل ہیں۔
اس بھرتی کے لیے امیدوار کا کسی تسلیم شدہ بورڈ سے بارہویں جماعت پاس ہونا اور UPSSSC PET 2025 کا درست اسکور ہونا لازمی ہے۔ امیدوار کی کم از کم عمر 18 سال اور زیادہ سے زیادہ عمر 40 سال مقرر کی گئی ہے۔ عمر کا تعین یکم جولائی 2026 کی بنیاد پر کیا جائے گا۔
جسمانی معیارات کے مطابق جنرل، او بی سی اور ایس سی زمرے کے مرد امیدواروں کے لیے کم از کم قد 168 سینٹی میٹر جبکہ ایس ٹی امیدواروں کے لیے 160 سینٹی میٹر مقرر کیا گیا ہے۔ خواتین امیدواروں کے لیے کم از کم قد 152 سینٹی میٹر ہے اور ایس ٹی خواتین کو 5 سینٹی میٹر کی رعایت دی گئی ہے۔
منتخب امیدواروں کو لیول-2 کے تحت 19,900 روپے سے 63,200 روپے تک ماہانہ تنخواہ دی جائے گی۔ تمام زمروں کے امیدواروں کے لیے درخواست فیس صرف 25 روپے مقرر کی گئی ہے۔
انتخاب کا عمل PET 2025 اسکور کی بنیاد پر شارٹ لسٹنگ، تحریری امتحان، جسمانی معیاری ٹیسٹ (PST)، جسمانی کارکردگی ٹیسٹ (PET)، دستاویزات کی جانچ اور طبی معائنے پر مشتمل ہوگا۔
درخواست دینے کے خواہشمند امیدوار UPSSSC کی سرکاری ویب سائٹ پر جا کر Forest Guard and Wildlife Guard Recruitment 2026 کے لنک کے ذریعے آن لائن فارم بھر سکتے ہیں۔ امیدواروں کو فارم جمع کرانے کے بعد اس کا پرنٹ آؤٹ محفوظ رکھنے کی ہدایت دی گئی ہے۔
