رسوئی,آپ کا دستر خوان✍️عرشی دلدارؔ بنگلور

آج آپ کو مختلف ڈشز کی ترکیب بتانے کے بجائے موسم سرما کے لئے کچھ نئے کھانوں کے متعلق آگاہ کرنا زیادہ مناسب معلوم ہوتا ہے۔ ان لاجواب پکوانوں کو ایک بار چکھنے کے بعد آپ اور آپ کے اہلِ خانہ انہیں بار بار کھانا چاہیں گے۔

ادرک جھینگا

ہمارے شیف کی ایک خاص ترکیب جو ہمیں بھی بہت پسند ہے وہ ہے ادرک جھینگا اس مزیدار پکوان کو سبھی پسند کرتے ہیں خاص طور پر سمندری کھانوں کے شوقین افراد کے لیے ادرک جھینگا ایک نعمتِ غیر مترقبہ ہے۔ روایتی سمندری کھانوں میں جدت کی جانب ایک اور قدم بڑھاتے ہوئے جھینگے کو ادرک اور دیگر تیز مسالوں کے ساتھ منفرد انداز میں پکایا جاتا ہے، تیز مسالوں میں پکے جھینگے ایک لاجواب پکوان ہے جسے ہر کوئی شوق سے کھاتا ہے۔ دوپہر کے کھانے میں کھانے کے لیے یہ ایک بہترین انتخاب ہے اسے چاولوں کے ساتھ کھائیں تو مزہ دوبالا ہو جاتا ہے۔

پران تھائی ریڈ کری prawn thai red curry

تھائی ریڈ چلی کی مدد سے بنائی جانے والی پران ریڈ کری چھٹیوں کی رات کی ایک بہترین ڈش جو کچھ ہی دیر میں تیار ہوجاتی ہے۔ اس مزیدار اور لذیذ پکوان کا نام سن کر ہی منہ میں پانی آجاتا ہے۔ یہ مشرقی ذائقے سے لبریز ایک ایسا تیکھا اور مزیدار پکوان ہے جو سمندری کھانے کھانے والوں کو خوب پسند آتا ہے۔ اسے اگر چاولوں کے ساتھ پیش کیا جائے تو اور بھی پُرلطف ہو جاتا ہے۔

بالٹی فِش

یوں تو مچھلی دنیا بھر میں کھائی جاتی ہے مگر بالٹی فش ایک ایسا پکوان ہے جسے خالص مشرقی انداز میں پکایا جاتا ہے۔ اسٹیل کی بالٹی میں پکائے جانے کے باعث اسے بالٹی فش کا نام دیا گیا ہے۔ ناریل کے دودھ اور تیکھے مسالوں میں پکی مچھلی کا یہ ایک منفرد اور لاجواب پکوان ہے جس کا گاڑھا مسالے دار مزہ آپ کو برسوں تک یاد رہے گا۔

اسے چاولوں کے ساتھ کھائیں یا گرم چپاتی کے ساتھ نوشِ جاں کریں۔ ظہرانے اور عشائیے میں کھانے کے لیے بہترین انتخاب ہے۔ اگر آپ تیکھے اور مسالے دار کھانوں کے شوقین ہیں تو یقین کریں کہ یہ منفرد پکوان آپ کے لیے ہی بنایا گیا ہے۔

جھینگا کڑاھی

مشرق کے روایتی کھانوں میں کڑاھی گوشت کو ایک خاص اہمیت حاصل ہے، کڑاھی میں ہر طرح کے گوشت سے بنے پکوان پکائے جاتے ہیں اور مزے لے کر کھائے جاتے ہیں اور اگر اسی کڑاھی میں لذیذ اور مسالے دار جھینگے پکائے جائیں تو کھانے کا لطف دوبالا ہو جاتا ہے۔
تازہ جھینگوں کو ہلکا سا بھوننے کے بعد مسالے دار گریوی میں ٹماٹر، مسالے اور دہی کے ساتھ ملا کر بنایا جاتا ہے، جھینگا کڑاہی کو نان اور چاول کے ساتھ پیش کیا جاتا ہے۔

جھینگا مسالا

منہ میں پانی لانے والا جھینگا مسالا ساحلی علاقوں کے شاندار پکوانوں میں شامل ایک نفیس، تیکھی اور لذیذ ڈش ہے جسے برصغیر کے ذائقوں سے لبریز کرنے اور جھینگے کے قدرتی ذائقے کو مزید تیکھا اور مزے دار بنانے کے لیے مسالوں کے ساتھ پکایا جاتا ہے۔ اگر آپ بھی جھینگوں سے بنے پکوان کھانے کے شوقین ہیں تو آپ کو اس موسمِ سرما میں اس لذیذ پکوان کو ضرور چکھنا چاہیے۔