ایس بی آئی میں 7 ہزار سے زائد اپرنٹس آسامیوں پر بھرتی شروع، گریجویٹس کے لیے سنہری موقع

نئی دہلی 23 مئی:(اردودنیا.اِن/ایجنسیز)ایس بی آئی State Bank of India نے ملک بھر میں 7,150 سے زائد اپرنٹس آسامیوں کے لیے بھرتی عمل شروع کردیا ہے۔ یہ بھرتی مہم بینکاری شعبہ میں تجربہ حاصل کرنے کے خواہش مند گریجویٹ نوجوانوں کے لیے اہم موقع مانی جارہی ہے۔ آن لائن درخواستوں کا عمل 19 مئی سے شروع ہوچکا ہے جبکہ اہل امیدوار 8 جون 2026 تک ایس بی آئی کے سرکاری کیریئر پورٹل کے ذریعے درخواست جمع کرا سکتے ہیں۔

ایس بی آئی کی جانب سے جاری نوٹیفکیشن کے مطابق امیدوار کا کسی بھی منظور شدہ یونیورسٹی یا ادارہ سے گریجویشن مکمل ہونا ضروری ہے۔ بینک نے واضح کیا ہے کہ درخواست گزاروں کو آن لائن فارم بھرنے سے قبل تمام تعلیمی شرائط پوری کرنی ہوں گی۔

عمر کی حد کے حوالے سے بتایا گیا ہے کہ امیدوار کی کم از کم عمر 20 سال جبکہ زیادہ سے زیادہ عمر 28 سال مقرر کی گئی ہے۔ ریزرو زمرے سے تعلق رکھنے والے امیدواروں کو سرکاری قواعد کے مطابق عمر میں رعایت دی جائے گی۔

بینک نے امیدواروں کو مشورہ دیا ہے کہ وہ درخواست جمع کرانے سے پہلے اپنی اہلیت کی مکمل جانچ کرلیں تاکہ دستاویزات کی تصدیق کے دوران کسی بھی قسم کی دشواری یا درخواست مسترد ہونے سے بچا جاسکے۔

ایس بی آئی SBI نے یہ بھی واضح کیا ہے کہ آن لائن امتحان میں کامیاب قرار دیے جانے والے امیدواروں کے لیے مقامی زبان کا امتحان لازمی ہوگا۔ امیدوار کو اس ریاست کی علاقائی زبان پڑھنے، لکھنے، بولنے اور سمجھنے کی صلاحیت رکھنی ہوگی جہاں سے وہ درخواست دے رہا ہے۔

بینک کے مطابق جو امیدوار مقامی زبان کے امتحان میں کامیاب نہیں ہوں گے، انہیں اپرنٹس پروگرام کے تحت حتمی تقرری نہیں دی جائے گی۔ اس شرط کا مقصد علاقائی شاخوں میں صارفین سے بہتر رابطہ اور بینکاری خدمات کو مؤثر انداز میں انجام دینا بتایا گیا ہے۔

بھرتی عمل کے تحت ایک آن لائن تحریری امتحان لیا جائے گا جس میں 100 معروضی سوالات شامل ہوں گے۔ ہر سوال ایک نمبر کا ہوگا جبکہ امتحان کا دورانیہ ایک گھنٹہ مقرر کیا گیا ہے۔

امتحان میں عمومی معلومات، انگریزی زبان، ریاضی اور ذہانت و منطق پر مبنی سوالات شامل ہوں گے۔ غلط جواب دینے پر منفی نشانات بھی لاگو ہوں گے اور ہر غلط جواب پر ایک چوتھائی نمبر کاٹ لیا جائے گا۔

درخواست فیس جنرل، او بی سی اور ای ڈبلیو ایس زمرے کے امیدواروں کے لیے 300 روپے مقرر کی گئی ہے جبکہ ایس سی، ایس ٹی اور معذور امیدواروں کو فیس سے استثنیٰ دیا گیا ہے۔

بینک نے امیدواروں کو ہدایت دی ہے کہ درخواست فارم بھرنے سے قبل مکمل بھرتی نوٹیفکیشن احتیاط سے پڑھیں اور ضروری دستاویزات کی اسکین شدہ نقول پہلے سے تیار رکھیں۔ چونکہ درخواست دینے کی آخری تاریخ 8 جون ہے، اس لیے امیدواروں کو آخری دنوں کا انتظار نہ کرنے کا مشورہ دیا گیا ہے تاکہ ویب سائٹ پر زیادہ دباؤ یا تکنیکی مسائل سے بچا جاسکے۔