روزانہ 2 گھنٹے موبائل بند کرنے سے دماغ تیز، یادداشت مضبوط اور تناؤ کم

آج کی تیز رفتار اور ڈیجیٹل دنیا میں جہاں ہر طرف شور، موبائل فون، ٹی وی اور کمپیوٹر کا غلبہ ہے، وہیں ماہرین نے ایک نہایت آسان اور مؤثر حل پیش کیا ہے۔ نیورو سائنسدانوں کے مطابق روزانہ صرف دو گھنٹے مکمل خاموشی اختیار کرنے سے دماغی صحت میں نمایاں بہتری آ سکتی ہے۔

ماہرین کا کہنا ہے کہ مسلسل شور اور ڈیجیٹل سرگرمیاں ہمارے اعصابی نظام کو تھکا دیتی ہیں کیونکہ دماغ ہر وقت مختلف معلومات کو پراسیس کرتا رہتا ہے۔ اس کے برعکس جب انسان کچھ وقت کے لیے مکمل خاموشی اختیار کرتا ہے تو دماغ کو آرام ملتا ہے اور وہ خود کو بہتر انداز میں منظم کرتا ہے۔

تحقیقی رپورٹس کے مطابق خاموشی دماغ کے ایک اہم حصے "ہپپوکیمپس” کو متحرک کرتی ہے، جہاں نئے دماغی خلیات پیدا ہوتے ہیں۔ یہ عمل جسے نیوروجینیسیس کہا جاتا ہے، یادداشت کو مضبوط بنانے اور جذبات کو متوازن رکھنے میں اہم کردار ادا کرتا ہے۔

امریکی ادارے Duke University کے محققین کی ایک تحقیق میں یہ بات سامنے آئی کہ روزانہ دو گھنٹے کی خاموشی دماغ میں مثبت تبدیلیاں پیدا کرتی ہے اور نئے خلیات کو محفوظ رکھنے میں مدد دیتی ہے۔

ماہرین کے مطابق بیک گراؤنڈ شور یا موسیقی دماغ کو وقتی طور پر متحرک تو کرتی ہے لیکن اس سے کوئی مستقل فائدہ حاصل نہیں ہوتا۔ اس کے مقابلے میں خاموشی دماغی خلیات کی نشوونما اور ان کے استحکام میں مددگار ثابت ہوتی ہے۔

یہ طریقہ نہایت آسان ہے۔ ماہرین مشورہ دیتے ہیں کہ روزانہ کچھ وقت کے لیے موبائل، ٹی وی اور دیگر ڈیجیٹل آلات بند کر کے کسی پرسکون جگہ پر بیٹھا جائے۔ ابتدا میں یہ مشکل محسوس ہو سکتا ہے، تاہم وقت کے ساتھ یہ عادت ذہنی سکون اور بہتر یادداشت کا باعث بن سکتی ہے۔

ماہرین کا ماننا ہے کہ اگر اس سادہ عادت کو روزمرہ زندگی کا حصہ بنا لیا جائے تو نہ صرف ذہنی دباؤ کم ہو سکتا ہے بلکہ دماغ طویل عرصے تک صحت مند اور فعال رہ سکتا ہے۔