دمشق،8فروری :(اردودنیا.اِن/ایجنسیز)ترکیہ اور شام میں پیر کی صبح آنے والے شدید زلزلے کے بعد تباہی کے مناظر کی تصاویر اور دلخراش ویڈیوز سوشل میڈیا پر وائرل ہیں۔شام میں تباہ ہونے والی ایک عمارت میں 17 گھنٹے سے ملبے تلے دبی شامی بچی اپنی چھوٹی بہن کی ڈھال بن گئی اور اس کے سر کو زخمی ہونے سے بچانے کی کوشش کرتی رہی۔العربیہ نیٹ کے مطابق سوشل میڈیا پر وائرل ویڈیو میں دیکھا جاسکتا ہے کہ ملبے تلے دبی شامی بچی اپنی چھوٹی بہن کے سر کو اپنے ہاتھ پر رکھے اور اسے اپنے سینے سے لگائے ہوئے ہے۔دونوں بہنیں ایک بڑے بلاک کے نیچے دبی تھیں اور حرکت کرنے سے بھی قاصر تھیں تاہم انہوں نے ہمت نہیں ہاری۔ شامی بچی اپنی چھوٹی بہن کو حوصلہ دیتی رہی۔

ریسکیو ٹیم جب موقعے پر پہنچی تو امدادی ٹیم کے ایک اہلکار نے شامی لڑکی کو باتوں میں لگایا تاکہ ریسکیو آپریشن مکمل ہونے تک انہیں اطمینان دلایا جا سکے۔ اہلکار نے اس سے چھوٹی بہن کے کھلونوں کے بارے میں پوچھا؟۔ ملبے تلے دبی شامی لڑکی نے ریسکیو اہلکار سے کہا کہ ’انکل مجھے یہاں سے نکال لیں۔ میں زندگی بھر آپ کی خدمت کرتی رہوں گی۔مقامی میڈیا اور ریسکیو اہلکاروں کے مطابق لڑکی اور اس کی بہن کو زلزلے کے 17 گھنٹے بعد ملبے سے نکال لیا گیا۔سوشل میڈیا پر وائرل ایک اور ویڈیو میں دیکھا جاسکتا ہے کہ شام میں حلب کے علاقے جندریس میں ملبے تلے دبی ایک بچی کو نکالنے کی کوشش کی جارہی تھی۔ بچی بے ہوش تھی۔

اسی دوران ایک اہلکار نے بچی کو مخاطب کرتے ہوئے کہا کہ ’تمہارے بابا یہاں ہیں۔ یہ سنتے ہی بچی کے اندر حرکت پیدا ہوئی اور وہ بلا ارادہ دیکھنے لگی۔گھنٹوں ملبے تلے دبے رہنے سے بچی کے پورے چہرے پر مٹی لگی ہوئی تھی۔ شام میں ہی زلزلے کے 24 گھنٹے کے بعد ایک منہدم عمارت کے ملبے تلے دبے شخص کو بھی نکالا گیا ہے۔شام کے شہری دفاع نے منگل کو ریسکیو آپریشن کی ویڈیو شیئر کی۔ ادلب کے ایک چھوٹے قصبے میں زلزلے سے مکمل تباہ ہونے والی پانچ منزلہ عمارت کے ملبے تکے دبے ایک نوجوان کو نکالا گیا جس کی شناخت صرف علی کے نام سے ہوئی۔

This video broke my heart 💔

The little girl says to the rescuer when he reaches her: Get me out from under this wreckage,sir,me and my sister, and I will become your slave.#earthquakeinturkey #Syria #هزه_ارضيه #زلزال #İstanbul #earthquake #Turkey #PrayForTurkey pic.twitter.com/U9mMrZdROM

— Zuher Almosa (@AlmosaZuher) February 7, 2023

شام: پورا خاندان جاں  حق، ملبے کے نیچے پیدا ہونے والی بچی سلامت رہی

دمشق؍دبئی،8فروری :(اردودنیا.اِن/ایجنسیز)جنوبی ترکیہ اور شمالی شام میں تباہی پھیلانے والے زلزلے کے بعد شام کے ایک قصبے میں امدادی کارکنوں کو کھدائی کے دوران ایک مکان کے ملبے سے نوزائیدہ بچی ملا جو کچھ ہی دیر قبل پیدا ہوا تھی اور اس کی نال اپنی ماں کے ساتھ جڑی ہوئی تھی۔ ماں زلزلے میں دب کر ہلاک ہو چکی تھی۔شیر خوار بچی کے ایک قریبی عزیز خلیل السویدی نے اے ایف پی کو بتایا کہ وہ اپنے خاندان کا زندہ بچ جانے والا واحد فردہے۔ اس کے گھر کے باقی تمام افراد زلزلے کی لپیٹ میں آ کر ہلاک ہو چکے ہیں۔

یہ علاقہ شام کے باغیوں کے قبضے میں ہے۔سوادی نے بتایا کہ انہیں بچی کی موجودگی کا اس وقت پتہ چلا جب بقول ان کے ہم نے کھدائی کرتے وقت ایک آواز سنی۔فوٹیج میں دکھایا گیا ہے کہ ایک شخص تباہ شدہ چار منزلہ عمارت کے ملبے سے ایک نوزائیدہ بچی کو نکال کر باہر لا رہا ہے جو دھول اور مٹی سے لت پت ہے۔بچی کو علاج معالجے کے لیے قریبی قصبے عفرین میں لایا گیا جب کہ خاندان کے دیگر افراد نے کئی گھنٹوں کی تلاش کے بعد بچے کے والد عبداللہ ، والدہ افرا، اس کے چار دیگر بہن بھائیوں اور خالہ کی نعشیں ملبہ کھود کر باہر نکالیں۔

عفرین کے اسپتال میں نوزائیدہ بچی کو انکیوبیٹر میں رکھا گیا ہے اور اسے ڈرپ لگائی گئی ہے۔ اس کے جسم پر زخموں کے نشان ہیں اور اس کی بائیں ہتھیلی پر پٹی بندھی ہوئی ہے۔سخت سردی کی وجہ سے اس کی پیشانی اور انگلیاں ابھی تک نیلی ہیں۔ڈاکٹر ہانی معروف نے بتایا کہ جب بچی کو اسپتال لایا گیا تو وہ ٹھنڈ (ہائپو تھرمیا) کے اثر میں تھی۔ اسے ٹھنڈ کے اثرات سے نکالنے کے لیے ہمیں اس کا جسم گرم کرنا پڑا اور اسے کیلشیم کی خوراکیں دینی پڑیں۔ڈاکٹر نے بتایا کہ اس کے جسم پر کئی زخم آئے ہیں۔